Pidato Bahasa Samawa :

“MA MO TU PATI PELAJAR INA BAPAK KITA”

Assalamualaikum warahmatullahi wabarakatuh...

Ramanik nabi Muhammad tu samula kewa basmallah, Bismillahirrahmanirrahim...

Ade saya hormati, ibu bapak dewan juri, ina kemina, dengan-dengan sanak sawai sanak salaki ade ada pang katokal ta.

            Mula-mula lema mo tu sangayap puja ke puji syukur kita ko repan mulia Alatala kuasa ka beang kita rahmat, nikmat sehat tu bau baremen batompok tu nuret lomba pidato umen tu sarame acara classmetting ano ta.

            Bapak ibu dewan juri ade saya hormati.

Pang kesempatan balong ta saya wakil keleng dengan-dengan kelas XI IPA 2, sate saya sanapat pidato ade berjudul “MA MO TU PATI PELAJAR INA BAPAK KITA”.

            Boat ibadat de agung pang dalam islam ke jira tu sangesa Alatala yanansi BIRUL WALIDAIN. Tu mati ko ina bapak kita. Ke kuda birul walidain?

Coba to ka ke kadu tu bayangkan 9 bulan le na kita pang dalam tian ina kita, meluk susah na ya bawa kita ko me-me, meluk susah na diri belangan, ya tunu kesakit si, pokok sarea hal dadi nomongka nyaman. Pas kita lahir diri senusu kita, ya lisir mentu kita tunu, ya pani kita, ya ganti lamong kita, ya jampang kita serea hal apa no poka tu bau boat diri tau. Nan si luk kabali, bapak kita enti boat siup rawi ya ta wa biaya telas kita sangano-ngano. Luk ka rea beban tanggung jawab tau dua ta, subhanalllah.

To mentu ka mo tu rea nopoka jira tanggung jawabna, malah lebe rea kabali, ya sakola kita, ya beang kita pipis belanya sangano-ngano, luk ka rango pamendi ina bapak ko sarea-rea kita, ka sarango kita, ya pepat kita, ke sia daki ompa, mikir, enti boat ma bau anak na ta telas yong mara anak-anak tau len ana.

Ibu bapak guru ade saya hormati, sanak sawai sanak salaki ade ada pang katokal ta.

Pang zaman to ta, peno tau no mo roa mati ko ina bapak na, muai beselalir, no remenong, no basarewa. Ada tau ade ya sekasar ina bapak na, ya renta-renta mo, ya amok-amok bahkan peno tu gita berita-berita pang dalam tv anak ade roa ate ya samate ina bapak na Cuma gara-gara hal ode. Contoh ade ka saya panto beru-beru ta tau selaki ade beru entek tega ya samate ina gara-gara nongka ya benag pipis kenang beli pulsa, naudzubillahimindzalik. Serdi ate tu menong berita nan luk na

            Padahal kita manusia, lebe khusus kita de beragama Islam ka suru kita, ya sewajib kita leng Alatala umen tu pati pelajar ke tu berbakti ke tau loka. Meluk ka ya satotang kita pang dalam surat Al-Ankabut :

$uZøŠ¢¹urur z`»|¡SM}$# Ïm÷ƒy‰Ï9ºuqÎ/ $YZó¡ãm (

Ade tegas na : ke kami sewajib manusia pina boat balong ko sadua ina bapak na.

            Kaleng ta bau tu to jelas-jelas Ala’tala ya suru kita taat, mati’, ke tu pina boat balong, ko sadua ina bapak kita. Ala’tala no rabeang ya kita durhaka ko ina bapak kita, ya pelang kita renyamong, dadi no bau kareng ya tu amok ina bapak kita, no bau serowa-roa kita. Pang dalam Al-Qur’an tu beleng  ah bae mo ya pelang kita, apalagi ade lebe kaleng nan.

            Masi totang cerita malin kundang? Cerita anak ade durhaka ko ina na, no roa aku ina na, nonda terima kasih, sesakit ate ina na, ka keras sombong jangka ya sapata leng ina na ma dadi batu, kareng ka kuasa Ala’tala tutu beruba dadi batu.

Nan bua kita lema mo tu berbakti ko ina bapak kita apa lamen nda ina bapak kita tentu no bau ada kita pang dunia ta, no akan bau tu hadir pang katokal ta tu kenang seragam sekolah yong mara ta. Na tu pina sak ate ina bapak kita, tu pati’ pengkeleng na, na tu pina ngamok, tu tulung mo nti boat sangano-ngano, tu rajin mo belajar, na mo tu nakal. Apa biasa ke peno kita ta mentu ya suru belajar jarang de langsung tu lalo belajar, peno benar alasan tau, ya si?

Tu totang gama na “Ridholloohi fii ridholwalidain wa sakhotullahi fii sakhotulwalidaini”, reda Ala’tala ada pang reda ina bapak kita.

kita ade ada pang katokal ta, na tu turet sifat  malin kundang satone nan, roa gama kita ade ada pang katokal ta tu dadi anak sukses karena do’a-do’a ina bapak kita, tu dadi manusia ade bau senyaman ate sadua na, tu bau dadi manusia ade berguna umen agama kita, umen bangsa kita, ke negara kita. Aamiin ya rabbalaalamiin..

ibu bapak guru ade saya hormati dengan-dengan sanak sawai sanak salaki ade ada pang katokal ta

nan si nasa ade bau saya sanapat, lebe kurang tu eneng maaf.

Ramanik nabi Muhammad tu samula kewa Basmallah tu sasuda kewa Hamdallah, Alhamdulillahirabbilalamin...

Wass.. war...wab..